Анѓушев: Во 2019 секоја градежна машина ќе биде активирана

Добивај вести на Viber

Вицепремиерот за економски прашања Кочо Анѓушев за 2019 година најави нова градежна офанзива и рече дека во 2019 години нема да има неангажирана градежна машина и нема да има доволен број градежни машини да ги сработат сите проекти што ќе бидат отворени.

Во емисијата „24 анализа“ Анѓушев, ги образложи таргетите на градежната експанзија за 2019 година. Меѓу нив се автопатот Кичево – Охрид, кој ќе почне интензивно да се реализира, а во моментот се отворени проекти за експресни патишта во Република Македонија како никогаш досега. Се гради експресниот пат Штип – Радовиш, Штип – Кочани, Куманово – Крива Паланка, Градско – Прилеп. Според планот и според зборовите на вицепремиерот кога сите овие градби и плус дополнително локалните патишта и уште 86те рехабилитации на постојните патишта, ќе се земат предвид, нема да постои неангажирана градежна машина. А кон тоа се приклучува и втората делница помеѓу Бељаковце – Крива Паланка, која што моментов е тендерирана, и која е проектирана на 147 милиони евра а колку ќе кошта ќе се знае откако ќе биде избран изведувач.

„Ако ние сакаме градежништвото да го вратиме на ниво за бројките да покажуваат како во периодот на Скопје 2014, но во физибилни проекти, ние во Републиката Македонија треба да имаме градежна реализација од 56 милиони евра месечно во инфраструктура, патишта, фабрики, приватна градба итн. Само овие проекти ќе дадат реализација над 55 милиони евра месечно, а на тоа ќе се  додаде и приватната градба. Тоа мене ми дава верба и аргументи дека следната 2019 година градежништвото ќе биде многу подобро“, истакна вицепремиерот.

Тој исто така потенцира дека клучно во градежната експанзија на земјата е градежните проекти да бидат физибилни, а не фиктивни, „Ако избираме меѓу тоа дали нешто по секоја цена треба да се прави, па тоа и да е прескапо платено, или да се прави нешто што е добро структурирано и домаќински изведено, јас секогаш ќе се определам за второто“, заклучи Анѓушев.