Антикорупциска му одговори потврдно на Заев: Започнуваме со проверка на судиите
Објавено во: Македонија 02 Декември, 2019
Антикорупциска комисија го прифати вчерашниот повик на премиерот Зоран Заев и потврдно му одговори дека ќе започне со проверка на имотната состојба на судиите, поротниците и обвинителите, како и нивните семејства, откако ќе го изготви потребниот план. Од Државната комисија за спречување на корупцијата тврдат дека ваквта одлука е донесена откако премиерот ветил дека извршната власт ќе им ги стави на располагање своите капацитети и ресурси.
„Согласно утврдените ризици во споменатата анализа, правосудството е оценето како столб со висок ризик од коруптивни и други влијанија, па оттаму носителите на функции од овој столб (судиите и јавните обвинители) ќе бидат дел од Годишниот план за следење на имотната состојба и судирот на интереси за 2020 година.
Законските надлежности на Државната комисија во делот на следењето на имотната состојба се спроведуваат преку проверка на вистинитоста на податоците внесени во анкетните листови, како и испитување на имотната состојба доколку има основано сомневање дека имотот на лицето е несразмерно зголемен во споредба со неговите редовни примања и примањата на членовите на неговото семејство.
Во делот на следењето на состојбата на судирот на интереси, Државната комисија ги проверува податоците од изјавите за интереси кои се однесуваат на работни места, членство во управни и надзорни одбори, здруженија на граѓани и фондации и други податоци кои се однесуваат на избраните и именуваните лица и членовите на нивните семејства.
Испитувањето на имотната состојба, е нова надлежност на Државната комисија, за чие спроведување потребно е зајакнување на постојните човечки и материјално – технички услови и вклучување на други истражни органи.
Имајќи ја предвид искажаната подготвеност на Претседателот на Владата на Република Северна Македонија за ставање на располагање на сите капацитети на извршната власт за ефикасно спроведување на постапките за испитување на имотната состојба, Државната комисија смета дека е неопходна координација на сите надлежни институции, но врз основа на конкретни задолжувања од страна на Владата на Република Северна Македонија“, се вели во соопштението на ДКСК.
Претседателката на Комисијата за спречување на комисија, Билјана Ивановска, по повикот од премиерот Зоран Заев до Антикорупциска да започне со чешлањето на имотната состојба и интересите на судството вчера му порача на шефот на Владата дека тоа не може да се случи без однапред утврден план.
Заев претходно во видео-обраќање побара од Антикорупциска како што се врши проверка на имотот и парите на сите членови на Владата во моментов, таа исто такада започне постапка на проверка на имотот и парите на судиите и обвинителите веднаш.
- Комисијата има таква можност и ја охрабруваме да ја спроведе веднаш, рече Заев и додаде дека извршната власт на Антикорупциска и нуди помош со сите свои капацитети само да се провери детално имотната состојба на судиите и обвинителите, како и нивните семејства.