Антикорупциска: Советникот на ДУИ од Охрид не смее да учествува на тендерот
Објавено во: Македонија 16 Јули, 2019
Комисијата за спречување на корупција денеска реагираше дека Нефи Усеини, советникот на ДУИ во општина Охрид, не смее да учествува на тендерот за уривање на дивоградби во градот затоа што и самиот поседува дивоградба.
Фирмата на Усеини е една од двете кои конкурираат на тендерот објавен од општина Охрид, а советникот од редовите на ДУИ изминатиот викенд свечено го отвори пица-ресторанот кај Чинарот во Охрид, поточно во најпрометниот дел од градот, без градежна дозвола.
Државната комисија за спречување на корупцијата укажува дека Хусеини како службено лице кое поседува економски оператор е во судир на улоги, односно дека тоа е против Законот за облигациони односи.
„Службено лице во вршењето на својата функција, јавни овластувања или должности не може да воспостави деловни односи со правно лице кое е во негова сопственост или во сопственост на член на неговото семејство или во кое тој или член на неговото семејство поседува акции или удели или кое го основал тој или член на неговото семејство или во кое одговорното лице е член на неговото семејство. Имено, фирма што е во сопственост на лицето Нефи Усеини, или во сопственост на негови блиски лица, не може да воспостави деловни односи со Општина Охрид, каде истото лице е член на совет“, појаснуваат од ДКСК.