Апсолутистичкиот владетел на Казахстан си поднесе оставка по 30 години на власт
Објавено во: Свет 20 Март, 2019
78-годишниот Нурсултан Назарбаев поднесе оставка како политички лидер на Казахстан, откако апсолутистичкиот владетел 30 години управуваше со земјата која политички припаѓа во Европа, но географски во централна Азија.
Последниот екс-советски политичар ја предводи земјата од 1989 година - прво како комунистички лидер, потоа како претседател. Тој ќе остане претседател на Советот за безбедност на земјата и водач на партијата Нур Отан, која има мнозинство во парламентот. До одржувањето на претседателските избори, претседателот на Сенатот Касим-Јомар Токаев привремено ќе ги исполни должностите на шефот на државата.
На последните избори во 2015-та Назарбаев освои 98 отсто од гласовите. Познат е по тоа што исто како и претседателот на Русија, Владимир Путин, бил агент на КГБ. Опозицијата се сомнева дека тој и понатамо ќе влијае на политиката во земјата иако формално е во оставка.
Казахстан е богат со нафтени наоѓалишта, а има и поволна географска положба граничејќи се со Русија и Кина.