АРГЕНТИНА СЕ СООЧУВА СО РЕКОРДНА ИНФЛАЦИЈА - стапката се искачи на 94,8 отсто
Објавено во: Финансии, Свет 13 Јануари, 2023
Во 2002 година, Аргентина имала инфлација од 94,8 отсто, што е највисока стапка во земјата по дури 32 години. Ова воедно е и една од највисоките стапки на инфлација во светот во 2022 година.
Сепак, смирувачки сигнали се дека стапката за декември од 5,1 отсто покажува релативно забавување во последните месеци.
Ценовниот показател за декември објавен денеска од Националниот институт за статистика (Индек) покажува тенденција на намалување на инфлацијата од месечниот врв од 7,4 отсто во јули, потоа 6,3 отсто во октомври и 4,9 отсто во ноември.
Инфлацијата во Аргентина беше 50,9 отсто во 2021 година, а по минатогодишниот пораст, владата очекува да ја ограничи на 60 отсто оваа година и врз таа проекција го заснова државниот буџет.
Претходниот рекорд беше во 1991 година, со неколку последователни годишни стапки на инфлација над 100 проценти. Таа година го означи крајот на циклусот на хиперинфлација над 1.000 отсто.
Аргентина, третата по големина економија во Латинска Америка, е заглавена во хронична инфлација, двоцифрена во последните 12 години од различни причини и домашни - враќање на буџетските дефицити, големи инфлаторни очекувања и надворешни - прво рецесија, и сега влијанието на војната во Украина, кои го спречуваат закрепнувањето.
Таа земја очекува економскиот раст во 2022 година да биде околу пет отсто, по растот од 10,3 отсто во 2021 година, додека претходните три години беше во рецесија.
Годинава се очекува растот на аргентинската економија да биде околу два отсто, забавен како и целата светска економија, но сепак еден од најсилните во Латинска Америка, според прогнозите на Светска банка објавени оваа недела.
Фото: EPA/ Enrique Garcia Medina