Азески: Формиравме кризен штаб, Комората на располагање на бизнисот 24 часа
Објавено во: Економија 25 Март, 2020
Претседателот на Стопанската комора Бранко Азески формираше Кризен штаб во комората кој 24 часовно ќе ја следи состојбата и ќе биде на располагање на стопанствениците. Стопанската комора на Македонија е најстарата и најголема бизнис-заедница во земјава, а во последниот период имаше интензивни контакти со компаниите, со претставниците на власта и со економските експерти.
Подолу повеќе ставови на Азески во однос на ситуацијата и одлуката да се формира штабот.
„ Прво, од сите разговори, сосема ми е јасно дека здравствено-економската криза ќе потрае најмалку уште неколку месеци, за што имав консултации и со нашите пријатели во Европа, меѓу најголемите светски производители и структури во Коморскиот инвестициски форум. Второ, сосема е јасно дека Владата која посветено работи на решавање на кризата, во најголем дел е потпрена на нашите ресурси.
Трето, состојбата кај вас, членките, е таква што тоа бара од нас 24-часовен ангажман. Токму затоа претседавачот на Собранието м-р Антони Пешев, потпретседателката д-р Елисавета Георгева-Јовевска, главниот советник на Управниот одбор за економски прашања Зоран Јовановски и извршниот директор м-р Биљана Пеева-Ѓуриќ ќе бидат секојдневно достапни за решавање на вашите проблеми. На средба во Владата на највисоко ниво, договоривме дека ќе бидат назначени и неколку лица од Владата, на кои ќе можеме да им се обратиме деноноќно за информации поврзани со решавање на проблемите. Исто така, договорена е и реорганизација на владиниот центар за повици за подобар пристап до него од вас и од вашите вработени.
Исто така, преку Коморскиот инвестициски форум во Трст, испративме писмо до претседателката на Европската комисија Урсула ван дер Леен, со две барања што ги засегаат земјите од регионот, а тоа се ограничувањето на извозот на заштитна медицинска опрема од европските земји и обезбедувањето дозволи за пристап до зелените коридори на компаниите од Западен Балкан, затоа што ценам дека во моментов најголем проблем е транспортот.
Писмо упатив и до својот колега од Турција, Рифат Хисарчиоглу, претседател на Унијата на турските комори и стокови берзи, во врска со задржувањето на нашите камиони на турските граници. Работевме и на регулирањето на дозволите за непречена работа на компаниите во трета и во четврта смена.
Продолжуваме со уште појако темпо затоа што тоа од нас го барате вие и кризата и, верувајте ми, ќе направам сѐ, покрај првичните неснаоѓања на апослутно невообичаената криза, Комората да профункционира најдобро.
Бранко Азески, Претседател на Стопанската комора на Македонија