Азески: Понудивме мерки до Владата за рационализација на потрошувачката на електрична енергија

Добивај вести на Viber

Бранко Азески, претседателот на Стопанската комора на Северна Македонија, беше денеска во посета на Синодот на МПЦ-ОА и од таму порача дека бизнисот на Владата му предложил неколку мерки, пред се во справувањето со енергетската криза и скапата цена за електрична енергија.

- Суровините се многу скапи а некои од нив не можат да се набават. Бараме да се подигне степенот на производство и да се рационализира потрошувачката на електрачна енергија. Понудивме решенија со јавно-приватни партнерства во делот на електропроизводството. Имаме предлози свои за јавните набавки како да се менаџираат во оваа ситуација. До крајот на годината да не се носат нови даночни задолжувања и да има предвидливост. Тоа се мерки за кои чекаме да видиме што ќе се случи со ребалансот па да седнеме со Владата да разговараме, гласеше одговорот на Азески на едно од новинарските прашања.

Коментирајќи го предлог ребалансот на буџетот, тој рече дека истиот е очекуван со кратењето на непродуктивните трошоци.

- Во ваква ситуација, ние сме подготвени за кризната ситуација, ги знаеме сите податоци и мобилизирани сме да помогнеме. Ги повикуваме сите министерства и Влада да бидат максимално одговорни и да помогнат.  Да се прилагодуваат на ситуацијата со намалување на некои непродуктивни трошоци. Не очекува тежок период, а ние навреме ќе предлагаме решенија. Бизнисот жилаво се држи, а мерките што ќе ги предлагаме се да опстои постојната економска активност и работните места, искоментира претставникот на бизнис фелата.

Азески потсети дека комората ќе добие орден за заслуги од претседателот Стево Пендаровски по повод 100-годишнината од формирањето, а денеска се во седиштето на МПЦ-ОА на честитање за признанието на автокефалноста.