Бајден и официјално стапи на претседателската функција на САД
Објавено во: Свет 20 Јануари, 2021
Џозеф Бајден и официјално стапи на претседателската функција на САД.
Со положувањето на свечената заклетва тој и официјално стапи на функцијата како 46-ти претседател на САД. Церемонијата започна со изведба на американската химна која ја пееше поп ѕвездата Лејди Гага, а по неа настапи и Џенифер Лопез. Бајден порача дека со обнова на сојузништвата, САД ќе биде партнер за мир и стабилност.
„Се слушна волјата на народот и се посвети внимание на волјата на народот. Повторно научивме дека демократијата е скапоцена, дека демократијата е кревка. И во овој час, мои пријатели, победи демократијата“, рече Бајден.
Инаугурацијата се одржа со протокол различен од претходните поради пандемијата и стравот од нови екстремистички напади. На церемонијата не присуствуваше досегашниот претседател Доналд Трамп, со што по 150 години стана првиот претседател во заминување кој не присуствуваше на инаугурацијата на наследникот. Трамп со своето семејство ја напушти Белата Куќа 4 часа пред церемонијата. Во последните часови од мандатот, Трамп во својот последен акт како претседател помилува 143 лица, меѓу кои и својот поранешен главен соработник Стив Бенон и познатиот рапер Лил Вејн.