Банкарите и гувернерката на средба: Лагите кои се објавуваат им штетат на банките и на економијата

Добивај вести на Viber

Објавувањето на како што велат непроверени информации, шпекулации и невистини ги седна на маса банкарите и Народната банка. На вонреден состанок разговарале и заклучиле дека лажните информации биле на штета на целиот банкарски систем и на економијата и општеството во целина. Во заедничко соопштение од Народната банка и од Македонската банкарска асоцијација стои дека банкарскиот сектор е еден од најајзначајните за земјава, а од друга страна лагите кои се ширеле по новите технологии и интернетот имале потенцијал да нанесат економски штети. Во соопштението не се прецизира за кои лаги станува збор. Во последниот период а по затворањето на Еуростандард банка во август лани, најзачестени напади кон Народната банка имаше од сопствеништвото на банката. Дополнително многу информации споделуваат и оштетените штедачи. Во соопштението, банкарите и Народната банка им се обраќаат на медиумите и поединците кои ширеле невистини.

„За таа цел, ги повикуваме медиумите секогаш, пред да објават каква било информација поврзана со банките, штедилниците и банкарскиот сектор, да ја проверат од релевантни извори, за да можат да им ја пренесат вистинската слика на граѓаните и на економските субјекти. Исто така, апелираме до граѓаните и економските субјекти мошне внимателно да ги проверуваат информациите коишто излегуваат во јавноста поврзани со банките и штедилниците, бидејќи не е во прилог на јавниот интерес создавање какви било избрзани реакции коишто покрај тоа што го одземаат времето, создаваат и дополнителни трошоци.

Злонамерни појави на ширење шпекулации и неточни информации имало и ќе има, а вообичаено се пласирани од личности кои покрај тоа што не водат сметка за својата одговорност, пред сѐ поради кратковидоста на своите лични интереси, не ги земаат предвид далекусежните влијанија на тие невистини врз јавноста и врз општеството во целина, стои во соопштението.