БЕГ: Ќе и ги вратиме парите на Адора
Објавено во: Економија 30 Септември, 2022
Балкан Енерџи Груп се јави со реакција во јавноста откако Ванчо Чифлиганец, сопственикот на Адор Инжинеринг, денеска во своето телевизиско гостување рече дека кај топланите Исток и Запад недостигаат 1,6 милиони евра наплатени од граѓаните.
„Неточна е изјавата на г-дин Чифлиганец дека БЕГ наплатил 1,6 милиони евра кои никаде ги нема. БЕГ од граѓаните наплаќаше согласно одлуки на РКЕ. Сите собрани пари од граѓаните БЕГ ги насочи да ги покрие трошоците за набавка на природен гас и електрична енергија. За жал овие трошоци беа многу повисоки од предвидените во тарифата за претходната грејна сезона и компанијата оствари големи загуби во првиот квартал и остана должна како на Адора така и на други доверители. Согласно правилата на РКЕ, компанијата има право да ги побарува остварените загуби од идните тарифи одобрени од РКЕ, по што ќе бидат подмирени обврските кон Адора и останатите доверители“, уверува БЕГ.
Од компанијата која ги загуби лиценците за снабдување, производство и дистрибуција на топлинска енергија за парно загревање велат и дека редовно го плаќале месечниот закуп кој како договор го имале со топланите, но за Чифлиганец како нов газда сумата била мала.
„Неточна е изјавата дека БЕГ бесправно стопанисувал со топланите бидејќи БЕГ ги користеше согласно Договор за закуп со Топлификација, а согласно Закон за облигациони односи договорот го наследува новиот сопственик на топланите. Во моментот кога Адора ги купи топланите знаеше дека истите се под долгорочен закуп на БЕГ за вршење на јавната дејност, што беше наведено и во огласот за продажба.
Согласно истиот Договор за закуп БЕГ редовно исплаќаше месечна закупнина во висина од 2,6 милиони денари, колку што одобрува РКЕ, меѓутоа Адора ја враќаше бидејќи ценеше дека е недоволно“, тврдат од БЕГ.