БЕКТЕШИ : Има економска оправданост за повисока акциза за два или три денари, но со механизам таа автоматски да се спушти ако цените растат

Добивај вести на Viber

Министерот за економја Крешник Бектеши вели дека има економска оправданост да се зголеми акцизата на горивата за два или три денари, но во тоа да се вгради и механизам за нејзино автоматско намалување кога цените на нафтата на светските берзи ќе се зголемат.

„Како министер надлежен за енергетика ја гледав анализата на Министерството за финансии, како и трендовите во соседството. Во моментов има економска оправданост да има зголемување на акцизата, но има и механизам, со тоа што во моментот кога ќе се покачат цените, автоматски да се намали акцизата“, рече министерот за економија, Крешник Бектеши.

За информација на граѓаните, вели тој, денеска утрово ја добил и анализата во споредба со регионот. Во Албанија на пример, цената на горивата е 37 денари повисока од кај нас, во Косово се повисоки за 28 денари, во Србија се повисоки за 33 денари од кај нас. И затоа, ние треба да им излеземе во пресрет и на МФ, но да не се грижиме само за расходите, туку и за приходите во буџетот, смета министерот за економија.

„Значи, економска оправданост има, и ако на Влада на предлог на Министерството за финансии се носи одлука за зголемување на цената на акцизата, било за два, било за три денари, ние како Министерство за економија ќе ја поддржиме таа одлука, со механизам дека кога цените на нафтата на пазарите ќе почнат да се зголемуваат, акцизата автоматски да се намали“, изјави Бектеши на денешната пресконференција.