Бектеши размислува за банкарска гаранција за агенциите до 100 илјади евра
Објавено во: Економија 20 Март, 2019
Од Министерството за економија најавуваат дека се размислува како опција во Законот за туристичка дејност да се воведе банкарска гаранција за агенциите, која би се активирала доколку граѓаните бидат измамени.
– Моментално има неколку верзии на Законот за туристичка дејност. Уште не сме решиле колку ќе биде банкарската гаранција, но тоа ќе зависи од лиценцата. Секако, доколку од контролите што ќе ги направи Државниот пазарен инспекторат се утврди дека се прекршени договорите што се потпишани со потрошувачите, како Министерство не само што ќе ја активираме банкарската гаранција, туку ќе ја одземеме и лиценцата, рече денеска министерот за економија Крешник Бектеши.
Додаде дека има различни предлози околу висината на банкарската гаранција, но оти за големите тур оператори гаранцијата ќе се движи од 50 до 100 илјади евра.
Од Министерството очекуваат законот да биде испратен до Владата на разгледување по претседателските избори.