Бектеши: Регистрирале мали фирми за да плаќаат поевтина струја
Објавено во: Економија 20 Мај, 2022
Крешник Бектеши, министерот за економија, на денешната прес-конференција, коментирајќи ја и енергетската криза, рече дека поголеми компании се трансформирале во мали претпријатија за да плаќаат поевтина електрична енергија на регулираниот, наместо поскапа на слободниот пазар.
Министерот дополни дека за овој случај е информирана Управата за јавни приходи.
- Што направиле одредени фирми? Го намалиле бројот на вработени до 50 и приходите до 2 милиони евра годишно за да може да плаќаат струја која што АД ЕСМ ја субвенционира за ЕВН Хоме, рече Бектеши.
Дополни дека со Регулаторната комисија за енергетика ваква пракса откриле и кај општините, а Бектеши посебно ја посочи Битола.
- Општина Битола има јавно претпријатие со помалку од 50 вработени и помалку од 2 милиони евра приходи и им го дало јавното осветлување на таа компанија за да оди на регулиран пазар, додаде тој.
Бектеши најави дека моделот на блок-тарифи со различни цени на плаќање за електричната енергија ќе биде одреден, откако ЕСМ ќе извести за колкава сума ќе му ја продава струјата на ЕВН Хоме.