Бектеши со вест од Украина: Македонските производи на украинскиот пазар без даноци или со ниски царини
Објавено во: Економија 16 Јуни, 2021
Крешник Бектеши, министерот за економија, денеска при посетата на Украина објави дека македонските производи ќе се извезуваат на украинскиот пазар или без даноци или со ниски царини.
„Денес, заедно со заменик-министерот за економски развој, трговија и земјоделство на Украина, Тарас Кака, претседававме со Третото заседание на Меѓувладината комисија според Договорот меѓу македонската Влада и Владата на Украина за економска и трговска соработка.
Наша заедничка желба е да ја зајакнеме и продлабочиме билатералната економска соработка меѓу двете земји. Договоривме нови можности за поголема либерализација на трговијата меѓу Северна Македонија и Украина.
Традиционалното пријателство меѓу двете земји е предуслов и стабилна основа за соработка да продолжи со позитивен тренд и во наредниот период во сите области од заеднички интерес, особено во економскиот план.
Во последните две години, поточно пред периодот на пандемиите, успеавме да им обезбедиме на граѓаните безвизен режим за краткорочен престој од 90 дена, директен лет Киев-Скопје и обратно, како и збратимување на седум општини од Северна Македонија и Украина.
Ова ја интензивира општата соработка, олеснувајќи ги деловните врски и контактите меѓу двете земји, како и развојот на туризмот“, објави Бектеши на Фејсбук.