БЕРЗАТА ГО НОСЕШЕ КОДЕКСОТ НЕТРАНСПАРЕНТНО: Кои се аргументите на компаниите, кои на Македонска берза?
Објавено во: Економија 13 Декември, 2021
Дел од компаниите кои котираат на берза не можат да стигнат и да ги применат барањата кои Македонска берза ги има со новиот Кодекс за корпоративно управување и е нелогично што измените се однесуваат за цела 2021 година односно ретроактивно, вели Анета Трајковска од Стопанската комора за Фактор, а откако комората реагираше и јавно и со писмо и побара да се одложи примената на оваа одлука. Трајковска е децидна дека ниту една компанија нема да го исполни барањето, затоа што тоа невозможно, но тврди дека ако инсиститрањето остане тоа ќе биде лошо за реномето на компаниите кои ќе имаат негативни рефренци.
“Компаниите треба да вградат соодветна изјава за усогласеност за корпоративно управување во годишните извештаи за оваа 2021 година, односно ретроактивно, а за тоа се известени во ноември месец, односно при крајот на годината. За да се вметне таа изјава од друга страна, треба да се прават усогласувања кои мора да поминат на акционерски собранија, не може да се менува туку така, треба да се менуваат и интерни акти, надлежности на управните и на надзорните одбори. Дополнително дел од овие барања не се усогласени со Законот за трговски друштва, вели Трајковска.
Од Комората велат дека процесот на носење на новиот Кодекс не бил целосно транспарентен и се децидни дека треба да биде одложен односно да важи од пролетта во 2023, а за тоа да се вгради соодветна изјава во годишните изјави за работа за 2022 година. Измените и дополнувањата на правилата за котација и кодексот за корпоративно управување на акционерските друштва котирани на „Македонската берза АД Скопје“ стапија на сила на 26 октомври 2021 година.
Инаку преку Комората на ова реагираат дваесетина копании кои котираат на берза, но како што велат оттаму, станува збор за реномирани фирми, дел од нив и со странски сопственици.
Од Македонска берза за Фактор велат дека при донесувањето на новиот Кодекс за корпоративно управување била организирана детална јавна расправа со котираните компании и голем дел од нивните забелешки била инкорпорирани во финалниот текст на овој стратешки документ.
„Ниту една компанија пред Берзата тогаш не го отвори прашањето на динамиката на неговата имплементација. Зошто сега се отвора ова прашање е нешто што Берзата не може да коментира. Иницијалната примена на Кодексот, односно вградувањето на Изјава за усогласеност со Кодексот во Годишниот извештај за работа на следното редовно годишно собрание во пролетта 2022 година не е ништо повеќе од скенирање на моменталните состојби во друштвата во однос на областите опфатени во Кодексот (Права на акционери и односи со акционери, Надзорен одбор, Управен одбор, Судир на интереси, Ризик и контрола, Засегнати лица, Транспарентност и Објавување). Применета е иста пракса како и на многу други пазари кога се воведувани Кодексите и/или кога се менувале истите, велат од Македонска берза.
Додаваат дека Кодексот спаѓа во т.н. мека регулатива и се применува според принципот „примени или објасни зошто не си применил“.
Од Берзата велат дека ја добиле иницијативата на Комората и дека ќе им одговорат.
Инаку Кодексот, согласно измените на Правилата за котација, треба да го применат 27 од 96 котирани компании.
А.Т.