БЕСПАРИЦА: Шри Ланка банкротираше, не можат да купат нафта, можен недостиг од храна

Добивај вести на Viber

Премиерот на Шри Ланка, Ранил Викремесинге , објави дека економијата на неговата земја, која со месеци ја доживува најтешката криза во својата историја, пропаднала и дека не може ни да плати за увоз на нафта.

„Нашата економија целосно пропадна“, рече премиерот Викремесинге во говорот пред парламентот, додавајќи дека Шри Ланка се соочува со сериозна ситуација која вклучува недостиг од гориво, гас, електрична енергија и храна.

Истакнувајќи дека тие не можат да платат ниту за увоз на нафта, Викремесинге рече дека владата пропуштила можност да ја промени кризата.

Граѓаните на Шри Ланка, која се соочува со најголемата економска криза во својата историја, кон крајот на март годинава стапија во штрајк поради прекин на електричната енергија што траеше 13 часа дневно.

На крајот на март низ целата земја се одржаа протести поради неколкучасовен прекин на електрична енергија и недостиг на храна, гориво и други витални добра, откако недостигот на девизи доведе до најтешката економска криза во Шри Ланка. Прекините на струја во земјава траат и до 13 часа дневно.

Судирите меѓу владините поддржувачи и демонстрантите избија на 9 мај, а воените единици беа повикани во главниот град Коломбо.

Поради зголемениот притисок на опозицијата, Махинда Рајапакса поднесе оставка од функцијата премиер. Претседателот Готабаја Рајпакса потоа го назначи Викремесинге за премиер на 12 мај, откако претходно ја извршуваше функцијата во три наврати.

Владата прогласи полициски час низ целата земја и им нареди на војниците да отворат оган врз секој што ограбува јавен имот или предизвикува штета.

Осум лица загинаа во протестите ширум земјата, меѓу кои еден пратеник од владејачката партија и двајца полицајци, а речиси 250 луѓе беа повредени.

Жителите на Шри Ланка во моментов се борат со недостиг на гориво, прекини на струја и зголемени цени на храната и транспортот.