Без инциденти и со помала излезност се прегласува во Чаир
Објавено во: Македонија 12 Ноември, 2017
Мирно и под засилено полициско присуство се одвива гласањето на гласачкото место 2901 во Општина Чаир, каде се повторува вториот круг од гласањето. До 13 часот на избирачкото место правото на глас го искористиле 150 гласачи.
„Гласачкото место е отворено на време и до овој момент гласањето тече не прекинато и без проблеми. До 13 часот од вкупниот број запишани избирачи на гласање излегле вкупно 150 односно 20,86 проценти“, вели Љупка Гугучевска – Портпарол на Државната изборна комисија
Претходно, и потпретседателката на избирачкото место, Лилјана Трошанска потврди дека гласањето почнало навремено и се одвива без никакви проблеми. Излезноста на граѓаните на ова гласачко место е речиси идентична како во првиот и вториот круг на изборите. Во првиот круг, до 13 часот гласале 155 гласачи, додека во вториот круг, бројката е иста како денеска.
За мирен изборен ден информираа и од невладината Цивил, чии набљудувачи остануваат во училиштето „Иднина“ до затварање на избирачкото место. Инаку, прегласувањето на ова гласачко место доаѓа откако Уставниот суд донесе одлука по жалбата на една политичка партија. На избирачкото место има вкупно 719 гласачи, а разликата меѓу кандидатите во оваа скопска општина беше 209 гласа.