Стопанството против нови избори-ќе бидат лоши за економијата
Објавено во: Економија 19 Јануари, 2019
Стопанските комори едногласни-предвремените избори ќе имаат негативен ефект врз економијата и инвестициската активност на компаните.
Најавените избори предизвикаа лавина од изјави дека наместо избори е потребно повеќе работа на економската агенда која владата ја најави за годинава.
За Миа од Стопанските комори посочуваат дека претседателските избори ќе се одразат негативно врз економијата и тогаш не може да се очекува раздвиженост во поглед на инвестициите, бидејќи и не се дискутира за економија туку се чекаат политички исходи.
„Кога има изборни циклуси, економијата стагнира. Изборните циклуси на секои шест месеци, со долги кампањи што им претходат, се фатални за стопанството, од причина што политичките процеси, најавените претседателски избори за годинава, а можеби и вонредни парламентарни избори, ќе потрошат речиси половина од следната година, што ќе се одрази негативно врз економијата и инвестициската активност на компаниите“, велат стопанствениците.
Предвремените парламентарни избори ќе го забават реформскиот процес и ќе предизвикаат застој на економското движење во државата.
Политичарите пак да му остават простор на бизнисот - пак е пораката на првиот човек на Стопанската комора Бранко Азески кој вели дека бизнисот треба да си заземе местото и непречено, надвор од политичките процеси да ги врши своите работи и надлежности, бидејќи тоа е во интерес и на државата и на стопанството.