Блерта Поцеста ќе одговара за убиството на родителите и сестра си кои ги уби додека спиеја

Добивај вести на Viber

Три лица ќе гони ОЈО од Гостивар за случајот со трикратното убиство во Дебар кое се случи минатата година во Дебар.

Блерта Поцеста е главната осомничена за убиството со кое од живот ги лиши родителите и помалата сестра

Од ОЈО во поднесеното обвинение посочуваат дека три лица се товарат дека биле инволвирани во убиството.

Како што се потенцира во соопштението од ОЈО, доказите покажуваат дека првообвинетата сторила кривично дело - убиство . 

„На 26 август 2018 година, во семејната куќа во Дебар, обвинетата пукајќи од непосредна близина со пиштол со калибар 7,65мм најпрвин ги лишила од живот сопствените мајка и татко, а потоа и малолетната сестра. Другите двајца обвинети со умисла и помогнале во извршувањето и прикривањето на кривичното дело.

Еден ден пред извршувањето на кривичното дело, првообвинетата телефонски контактирала со второобвинетиот и се сретнала со него во Гостивар. Второобвинетиот изнајмил возило и заедно се упатиле кон Дебар за да набават оружје. Истиот ден, во близина на Градската болница во Дебар, се сретнале со третообвинетиот, кој им обезбедил пиштол и рамка со пет куршуми.

По извршувањето на кривичното дело, обвинетата се упатила во Струга, каде се сретнала со второобвинетиот и му ги дала клучевите од изнајменото возило да го врати во Гостивар. Обвинетата со такси отишла на аеродромот во Скопје од каде со авион заминала за Република Италија“, соопштуваат од ОЈО.

Според надлежниот јавен обвинител до Основниот суд во Гостивар доставил и предлог за продолжување на мерката притвор за обвинетите лица.