Боки 13 утринава однесен во операциона сала, интервенцијата е ризична
Објавено во: Македонија 30 Март, 2023
Утринава во болницата „Св.Наум Охридски Скопје“ започнала операцијата на Бојан Јовановски-Боки 13 објави „Макфакс“. Боки утринава бил однесен во операциона сала, каде треба да му биде извршен оперативниот зафат. Адвокатот Владимир Туфегџиќ, полномошник на Јовановски-Боки 13 за „Макфакс“ ја потврдува информацијата и посочува дека станува збор за сложена интервенција која е ризична и животно-загрозувачка.
„По завршување на сите медицински испитувања, денеска во Универзитетската клиника за хируршки болести Св.Наум Охридски Скопје, се извршува хируршка интервенција врз Бојан Јовановски од страна на тим од повеќе специјалисти – хирурзи. Станува збор за исклучително сложена хируршка интервенција која е високо ризична и животно загрозувчка, на чии последици повеќе пати навремено писмено укажуваа лекарите специјалисти од областа“, вели адвокатот Туфегџиќ за „Макфакс“.
Дека ќе дојде до операција се навестуваше месеци наназад од страна на Јовановски-Боки 13 и неговиот адвокатски тим. Тие бараа хуман третман и да бидат почитувани мислењата од докторите од болницата „Св.Наум Охридски Скопје“ кои ординираа терапија и кажаа дека состојбата не може да се санира во затворски услови.
Адвокатот Туфегџиќ посочува дека операцијата можеше да се одбегне ако надлежните органи односно Кривичниот суд и Управата за извршување санкции постапеле правилно.
Пред кратко време се огласи и мајката на Бојан, Јасминка Јовановска, која потенцираше дека ќе му биде извршена операција тотална гастректомија, односно целосно отстранување на витален орган желудник, со што ќе настапи траен инвалидитет кај нејзиниот син укажувајќи воедно дека значително е влошената неговата здравствена состојба.