БОРИС ЏОНСОН ПОВТОРНО ВО ПРОБЛЕМИ: Сопругата му направила роденденска журка за време на карантинот во Британија
Објавено во: Свет 25 Јануари, 2022
Британскиот премиер Борис Џонсон се соочи со нова криза во
неговиот мандат кога беше обвинет дека присуствувал и на друга забава за време на карантинот. Според новите
откритија, Џонсон го прославил својот роденден во 2020 година со уште 30 луѓе на Даунинг стрит. Во тоа
време, ваквите собири беа забранети со една од најрестриктивните мерки против ширењето на корона вирусот.
ITV News тврди дека Џонсон присуствувал на забавата организирана од неговата сопруга Кери на 19 јуни 2020 година во Даунинг стрит бр. 10, по повод прославата на неговиот 56-ти роденден.
Тие, наводно, го прославиле неговиот роденден откако посетиле училиште во Хертфордшир, каде Џонсон позирал со раширени раце за да ја покаже важноста на социјалното растојание.
На журката, наводно, присуствувал и Мартин Рејнолдс, главниот приватен секретар на Џонсон, кој исто така се соочува со критики за забавата на Даунинг стрит.
Неговиот кабинет негираше дека била организирана забава и за ITV News изјави дека група вработени кои работеле во премиерската резиденција тој ден се собрале накратко во кабинетот по состанокот за да му го честитаат роденденот на премиерот, „и тоа траерло помалку од 10. минути“.
Се верува дека на премиерот му била дадена торта додека неговата сопруга го охрабрувала персоналот да му пее роденденска песна на Џонсон. Џонсон и претходно даваше различни објаснувања за забавите во неговата резиденција. Прво изјави дека не е прекршено ниедно правило, а потоа им се извини на Британците.
Ова ново откритие доаѓа во време кога Џонсон е под истрага за првата забава на Даунинг стрит, што се одржа во мај 2020 година. Сите во Британија со нетрпение го очекуваат извештајот на Сју Греј, кој би можел да го отстрани Џонсон од функцијата.
Неколку месеци пред неговата роденденска забава, Џонсон ја пофали студентката која ја откажала роденденската забава поради изолација. Тој напиша на Твитер: „Жозефин на сите ни дава одличен пример со одложување на роденденската забава додека не го решиме проблемот со корона вирусот“.