Бујар Османи: САД досега ни помагаше со пари против корупцијата, ама отсега со експерти
Објавено во: Македонија 07 Декември, 2022
Бујар Османи, министерот за надворешни работи, го поздрави пристигнувањето во Скопје на американскиот експертски тим за борба против корупција и како одговор на новинарско прашање одговори дека тоа ќе биде еден процес на ветинг кој ќе ги опфати сите нивоа на државното управување.
- Го поздравуваме засилениот ангажман на САД во поддршка на домашните институции во владеењето на правото и борбата против корупцијата. Штом го започнавме стратешкиот дијалог, САД прво финансиски не помагаше. Ни даде над 4 милиони евра само за прашањето на владеење на правото. Еве сега продолжува со дополнителни механизми, преку поддршка од страна на експерти, искористување на нивните механизми. Тоа е дел од тоа ние што го побаравме. Јас стравував дека ќе останеме без таков мониторинг ако преговорите (со ЕУ) се одложат. И тогаш им рековме на САД - дајте да ја подигнеме на повисоко ниво оваа наша слабост
Кај нив е напишано „корумпираните актери“, што мислам дека е едно сеопфатно гледање. Корупцијата не е само во политиката, туку на секое ниво. Секаде каде што граѓаните бараат услуга на шалтер. И ништо не сме направиле ако немаме сеопфатен пристап - од портирот на врата до највисокиот функционер, искоментира шефот на македонската дипломатија.
Тимот за санкции од САД пристигна во Македонија за да изврши увид во бившите и сегашните корумпирани функционери, по што ќе следува и соодветен одговор, објави вчера американската амбасадорка Анџела Агелер на Твитер.
„Тимот за санкции од Вашингтон е тука заради поагресивен поглед на минатите и сегашните корумпирани актери и да ги разгледа сите можни одговори. На правосудниот сектор во Северна Македонија му требаат повеќе истраги и гонење за да се покаже дека никој не е над законот“, напиша Агелер на Твитер.