Царовска: Исплати по новиот закон за социјална заштита уште во јуни
Објавено во: Македонија 16 Мај, 2019
Министерката за труд и социјална политика, Мила Царовска, за „Фактор“ изјави дека в петок очекува долгонајавуваниот Закон за социјална заштита да го мине комисискиот филтер во Собранието и веднаш да биде изгласан на пленарна седница со што на социјално загрозените ќе им се исплати помошта уште в јуни.
„Го повикувам Влатко Ѓорчев, претседателот на собраниската комисија за труд и социјална политика и останатите пратеници конечно да изнајдеме една заемна соработка и да го доведеме овој закон што побргу во функција на социјално ранливите, изјави Царовска на отворањето на Енергетскиот форум 2019 во Струга.
Министерката рече дека не очекува дополнителни процедури за овој закон да стапи во сила и дека првите исплати по истиот треба да бидат уште во јуни.
„Законот е таков што веднаш штом стапи во сила ќе следуваат и првите исплати. Нема да има потреба од носење подзаконски акти. Очекувам првите исплати на категориите од социјалната помош да бидат исплатени уште во јуни, односно тоа да бидат мајските приходи што им следуваат на категориите опфатени со законот“, вели Царовска.
Една од најважните реформи во законското решение е гарантираниот минимален приход, како и неколку други важни промени, меѓу кои и конечна дефиниција за лицата со попреченост, децентрализација на системот за социјална заштита и вклученост на општините за обезбедување сервисни служби.
А.К.