Цената на нафтата ги изненади сите
Објавено во: Економија 14 Декември, 2018
Падна цената на нафтата.
Кинеските економски податоци ја спуштија цената на нафтата под 61 долар.
Цената на нафтата се намали денеска на меѓународните берзи под нивото од 61 долар откако најновите податоци од Кина покажаа побавен економски раст. Ова е сигнал за послаба побарувачка за енергенси кај најголемиот увозник на нафта во светот.
Вредноста на барелот на лондонската берза се намали за 55 центи во однос на претходното затворање, на 60,90 долари за барел. На американската берза барелот се тргуваше по 35 центи пониска цена, од 52,23 долари.
ОПЕК утрово информираше дека цената на барелот на референтната кошничка на неговата нафта е 58,67 долари, што значи дека паднала 53 центи во однос на претходниот ден од тргувањето.
Рускиот министер за енергетика Александер Новак најави дека државата постепено ќе го намалува производството на нафта. Во првата фаза производството на нафта ќе биде намалено за 50.000 барели дневно.
OПЕК и групата независни потрошувачи, вклучително и Русија, минатата седмица постигнаа договор за намалување на производството за вкупно 1,2 милиони барели дневно за да се намали вишокот во снабдувањето. Тоа би требало да биде доволно за во вториот квартал следната година на пазарот да се јави недостиг, доколку споменатиот нафтен картел и другите големи произведувачи се придржуваат до договорот, објави Меѓународната агенција за енергија (IEA) во својот најнов месечен извештај.