Четири земји ќе ги примаат мигрантите спасени во Медитеранот
Објавено во: Свет 23 Септември, 2019
Во Малта е постигнат привремен договор за распределување на мигрантите.
Малта, Италија, Франција и Германија постигнаа иницијален и привремен договор за распределување на мигрантите спасени во Медитеранот.
Деталите од договорот засега не се познати, но министрите, по средбата, кажаа дека станува збор за солидарен механизам и изразија надеж дека останатите 24 колеги ќе се придружат кон оваа иницијатива.
Документот ќе им биде презентиран на другите земји членки на ЕУ на 8 октомври на министерскиот совет за внатрешни работи во Луксембург.
Министрите за внатрешни работи на овие четири земји одлучија да го одржат овој состанок за да најдат привремено решение на сѐ побројните инциденти во Медитеранот, каде бродови кои спасуваат мигранти не можат да се вкотват со денови, некогаш недели, во отсуство на сеопфатен договор на ниво на ЕУ за прераспределување на барателите на азил.
Малта и Италија се на удар на мигрантските бранови од Африка како најблиски пристаништа во централен Медитеран, а Франција и Германија се погодени од секундарните движења, односно земји во кои мигрантите заминуваат откако ќе влезат во Шенгенската зона, но и редовно волонтираат да прифатат релокација на мигранти кога тоа е потребно.
Ќе се направи прераспределба на луѓето кои ќе пристигнуваат на европското крајбрежје.
Бродот „Океански Викинг“ на кој имаше 182 спасени мигранти, вчера пловеше по меѓународни води меѓу Италија и Малта, и чекаше дозвола од некоја европска земја да се закотви во нејзино пристаниште.
На бродот имало мигранти од Либија кои биле спасени минатата недела.
Во петокот од бродот се симнаа 35 лица кои ги прими Малта.