Човековата негрижа нема граници: умре последниот мажјак од северниот бел носорог
Објавено во: Свет 22 Март, 2018
Згасна животот на северниот бел носорог Судан. Носорогот Судан е роден во државата Судан, живеел во зоолошка градина во поранешната Чехословачка, а потоа е префрлен во Кенија каде што живеел со последните две женки од неговиот вид, 27-годишната Наџин и 17-годишната Фата.
Разерватот OI Pejeta Conservancy соопшти дека морало да донесат одлука во понеделникот да се изврши евтаназија на Судан, поради неговата здравствена состојба којашто сé повеќе се влошувала. Со своите 45 години овој носорог бил под постојан лекарски надзор поради неговата возраст.
„Неговата состојба во последните 24 часа драстично се влоши, не можеше да стои и многу се мачеше. Поради тоа ветеринарскиот тим одлучи да го евтанизира“, соопшти OI Pejeta Conservancy.
Кениските власти го чуваа Судан под посебен режим, со чувари, во страв од криволовците, па дури и му отстранија еден рог за да биде помалку привлечен за илегалните трговци со овој трофеј инаку на азискиот пазар сé повеќе баран материјал за дизајнирани предмети од домаќинството.
По евтаназијата на носорогот, ветеринарите земале генетски материјал од Судан, а експерите се надеваат дека ќе може да биде клониран.
Белиот северен носорог тежи до 2.400 килограми и е третото најголемо животно на африканскиот континент, по слонот и нилскиот коњ.