Ципрас вели дека ако не бил Договорот од Преспа на север би имале сојузник на Ердоган

Добивај вести на Viber

Eкс грчкиот премиер, Алексис Ципрас кој го потпиша Договорот од Преспа, смета дека тој има многу бенефити за Грција. 

Според него ако Владата на СИРИЗА тогаш отстапеше пред  притисоците на сегашниот премиер Кирјакос Мицотакис и радикалната десница и ако немаше сериозност, па дури и храброст да ја прифати политичката и партиската цена, денес на северната граница  наместо пријател, ќе имале непријател и веројатно уште еден сојузник на Турција на Реџеп Таип Ердоган, како што е Либија. 

„И се подразбира што ова би значело во услови на опасна ескалација на турската провокација“, изјави  Ципрас.

Тој на расправата во грчкиот Парламент за законот за проширување на територијалните води во Јонското Море, говорејќи за надворешната политика на земјата, се осврна и на Договорот од Преспа и упати критики до грчкиот премиер Мицотакис за позицијата што тој и неговата партија ја имаа кога беа опозиција и сега како Влада, јави дописничката на МИА од Атина. Ципрас го потсети Мицотакис „со каква леснотија аплаудираа“ за време на расправата за ратификација на Договорот од Преспа пред две години, на изјавата на тогашниот пратеник од Нова демократија, а сега министер за внатрешни работи Макис Воридис, кога „ја нарекуваше Владата на СИРИЗА – Влада на национално предавство“.

Договорот од Преспа е потпишан во јуни 2018 година во Нивици.