Добивај вести на Viber
Трговците во САД не се задоволни од резултатите на потрошувачката манија во текот на „црниот петок“. Резултатите покажуваат дека се потрошени дури 1,7 милијарди долари помалку во однос на 2012 година.
Во американската национална Федерација за малопродажба, велат дека и тоа е една од видливите последици на тромото заздравување на најголемата светска економија.
Претставници на оваа асоцијација тврдат дека помалиот обем на продажба во текот на минатиот викенд, кога потрошувачите почнуваат масовно да ги опседнуваат продавниците поради големита распродажби, е логична последица на финансиските проблеми на поголемиот број Американци.
Овој викенд, вклучувајќи го и четврток 28. ноември - кога беше прославен Денот на благодарноста, потрошувачите ширум САД купувале разна роба во вредност која е за 1,7 милијарди долари помала во споредба со истиот период лани, пренесе весникот Њујорк тајмс.
Вест за утеха е дека бројот на луѓе кои од четвртокот до неделата купувале во продавниците по системот на он-лајн трговија, е зголемен годинава, односно за симболичен еден отсто во однос на минатата година, на 141 милион.
Потрошувачите, меѓутоа, оваа година, во просек потрошиле, во текот на четирите празнични денови, 407,2 долари, наспроти 423,55 долари во истиот период лани.
Гледано во целина, проценката е дека оваа година Американците на празничен шопинг ќе потрошат 57,4 милијарди долари, или околу три отсто помалку отколку пред година дена.