ДА ПЕШАЧИМЕ, ДА КОРИСТИМЕ ЈАВЕН ТРАНСПОРT, ДА ГО ПРОМЕНИМЕ НАЧИНОТ НА ГРЕЕЊЕ: Moжеме ли на тој начин да им „објавиме војна“ на ПМ честичките?

Добивај вести на Viber

Можеме почесто да користиме јавен транспорт, да практикуваме да не се возиме сами во автомобил, кога времето дозволува да возиме велосипеди, а доколку сме во можност да го смениме начинот на греење во домот, но без системски мерки нема да има некој голем ефект во намалувањето на аерозагадувањето.

Биологот и долгогодишен екологист Нестор Јаулески вели дека во ниту една земја во светот, свеста на граѓаните не е на толку високо ниво за да може драстично да се намали загадувањето на воздухот. Како пример ја наведува Виена, каде во минатото била донесена забрана во автомобил да се вози само еден човек, но граѓаните наоѓале начини за манипулација.

„Бидејќи сум вклучен во образовниот процес како професор, гледам дека свеста кај младите се менува, но тоа оди бавно и е потребно време за нештата да се сменат. Ние не треба да се откажуваме како општество од тие промени, но мислам дека како поединци сами не можеме многу да направиме. Потребно е да се донесат системски мерки, и не само да се донесат, туку и да се почитуваат. Според мене, проблем е непланското градење, непочитување на тоа колкави зелени површини треба да имаме според бројот на населението, големиот број автомобили“, вели Јаулески.

Новата година Македонија ја почна со неславни рекорди, а на Бадник, Скопје беше високо на листата на најзагадени градови во светот. Скоро секој ден сликата е иста. Податоците од мерните станици покажуваат дека од Куманово до Гевгелија, и од Тетово до Струмица, воздухот е високо или многу високо загаден.

„Секој граѓанин треба прво да мисли за себе, така што можат да ја намалат употребата на автомобилите. Ако одат до кеафана или на прошетка, не мора секогаш да возат автомобил“, вели Синан Гајур од еколошкото друштво „Голема Речица“ од Тетово.

Последните две години, само Дебар отскокнува како град каде воздухот е ниско загаден. Апликацијата Мој воздух покажува дека и во Свети Николе воздухот е загаден. На Балканот, Скопје и Сараево се едни од најзагадените градови.