КАKO СЕ ТРОШЕЛЕ ПАРИТЕ: ВМРО-ДПМНЕ обвини дека обвинителите во СЈО си вработувале роднини
Објавено во: Македонија 18 Септември, 2019
ВМРО-ДПМНЕ објави список од 25 лица вработени во СЈО по линии на непотизам.
Обвинителот Гаврил Бубевски во СЈО си ги вработил братучедите Ефимија и Љупчо Чучурски. Ленче Ристоска си ја вработила братучетката Андријана Ристоска, Лиле Стефанова го вработила кумашинчето, Елизабета Јосифовска – ќерката и внукот. Ова е само дел од бројните имиња на блиски роднини на обвинителите, кои ВМРО - ДПМНЕ денеска ги објавија како примери на непотизам. Тврдат и дека, Катица Јанева си ги вработила внукот од сестра и девојката на синот, како и членот на СДСМ, Борче Боки Трајковски, кој претходно бил една година во затвор за измама.
Од ВМРО- ДПМНЕ уште еднаш апелираа до пратеничките групи во Собранието да го поддржат предлогот за основање на Анкетна комисија и заедно да и дозволат на јавноста увид во досегашното работење на Специјалното јавно обвинителство и на разрешената обвинителка, Катица Јанева.. Бараат да се истражат наводите дека, покрај високите плати, обвинителите си делеле и дневници, награди и бонуси, и на што СЈО потрошило 15 милиони евра.