Дачиќ очекува многу од сопругата на Палмер која е Србинка

Добивај вести на Viber

Српскиот шеф на дипломатијата, Ивица Дачиќ, за именувањето на специјалниот претставник на САД за Западен Балкан, на Бледскиот форум рекол дека Америка со овој гест покажала дека сака да биде појасно присутна во регионот.

На прашањето модераторот што очекува од Метју Палмер, изјави дека од американскиот функционер со кого се познава со години не очекува ништо, но дека очекува многу од неговата сопруга, која е од Србија.

„А во нашиот регион се вели – од каде ти е жената, и ти си оттаму“ – рекол Дачиќ.

„Сопругата Даница ја запознав во Белград пред неколку години. Иако таа е родена во Белград, фамилијата Дамјановиќ има корени во Црна Гора. Имаме куќа во Добра Вода кај Бар, каде го поминуваме поголемиот дел од летото“ – одговорил тој во 2014 година на прашање на подгорички Вјести, за каква поврзаност има со Црна Гора.

Докторката Даница Палмер дипломирала на Медицинскиот факултет на Универзитетот во Белград и на пракса е повеќе од 20 години. Таа е вработена како психијатар во болница во Александрија, Вирџинија. Специјализирала дијагностика и лекување на ментални болести, како депресија, анксиозни пореметувања, злоупотреба на супстанци и шизофренија. Зборува шпански, српски и хрватски јазик.