Дали бројот на социјалци во Македонија се намалува или зголемува?

Добивај вести на Viber

Секоја година бројот на корисници на социјална помош се намалува, велат од Министерството за труд и социјална политика.

Додаваат дека намалувањето се должи на електронската размена на податоци меѓу различни институции од кои се прибираат докази за состојбата на корисникот, како и врз основа на контролите за исполнување на условите за остварување на правото кои се законски пропишани.

Ако во 2013 година имало повеќе од 30.000 корисници, во 2018 година таа бројка е сведена на 24.000 корисници на социјална помош.

„Реформата во социјалната заштита и заштитата на децата се насочување кон намалување на сиромаштијата на домаќинствата во социјален ризик, со посебен ефект за намалување на детската сиромаштитија. Воведувањето на парична помош може да се гледаат единствено како семеен  пакет на права во согласност со потребите на домаќинствата и граѓаните. Реформата треба да помогне во извлекувањето на најранливите над линијата на сиромаштија и во ниту еден случај на неа не треба да се гледа како нешто што ќе ги загрози трудоинтензивните дејности каде што има минимална плата, туку напротив како процес во кој ќе се обезбедат што поголем број работници, нешто што во моментот е горлив проблем на државата. Целта на оваа реформа е да ги активира примателите на гарантиран минимален приход на пазарот на трудот преку доквалификација, дообука и и слично, и да ги натера нивните деца да се вклучат во образовниот процес“, велат од МТСП.

Додаваат дека за лицата, домаќинствата во ризик поради материјална  необезбедност предвидена е  гарантирана минимална помош, како и 1.000 денари  месечно во текот на шесте  зимски месеци за покривање на трошоците за греење. Истовремено во областа на заштитата на децата, се овозможува за прв пат корисниците на гарантирана минимална помош да можат да користат детски додаток и образовен додаток за деца кои редовно посетуваат настава во основно и средно училиште, заради поддршка на родителите во подмирувањето на училишните трошоци, со што се превенира раното напуштање на училиштето.

Оваа реформа ќе ги опфати и домаќинствата  кои остваруваат  ниски примања, кои  исто така ќе имаат право на остварување на детски додаток и образовен додаток за децата, со што бројките на корисниците на образовниот и детски додаток ќе се зголеми за 20 пати.

Социјалната помош годинава се зголемува и ќе изнесува 11.700 денари, додека минималната плата е 12.000 денари.

Ова ќе ги стави во незавидна положба газдите кои исплаќаат минималец.

„Кој ќе работи ако социјалното е 12.000 денари, а јас колку што знам не е само кожарскиот сектор, и трговијата и текстилот е со плати од 12.000 денари. Сепак засега нема работници кои даваат отказ“, вели Лидија Милановска од Здружението на чевлари.

Социјалното скокна за 3 пати, и практично ќе се изедначи со минималната плата.