Дали грчки македонски организации им се закануваат со смрт на пратениците кои ќе гласаат за сложено име?
Објавено во: Балкан 20 Март, 2018
Смрт или доживотен затвор за оние пратеници кои ќе гласаат за сложено име, се заканите што доаѓаат од грчките македонски организации испратени преку текстови до членови на грчкиот Парламент, вели претседателот на Парламентот Никос Вуцис.
Вуцис откри дека пратениците добиваат закани по живот, коментирајќи дека „некои тука забегаа“, пренесува дописникот на МИА од Атина.
„На грчките пратеници им беа поделени текстови од претставници на грчките македонски организации од светот нешто што усно го имавме слушнато, но не дадовме големо значење. Сега поделија на секој пратеник, каде што ни помалку ни повеќе нѐ обвинуваат за предавство и велат дека казната е смрт или доживотен затвор ако некој се осмели да гласа за предлогот на Министерството за надворешни работи и на грчката Влада, доколку дојде и кога ќе дојде во грчкиот Парламент и доколку се созреани условите за сложено име“ - изјави тој.
Текстот со закани од грчките организации од дијаспората до пратениците е изготвен на 25 страници, а во него тие говорат за „противуставно и недемократско отстапување на името Македонија“ и тврдат дека сите пратеници што ќе гласаат спротивно на нивните барања, ќе бидат виновни „за предавство и директно соучество во загрозување на територијалниот интегритет на земјата, нешто што е казниво со доживотен затвор и смрт“.