Дали Русија поддржува промена на границите на Балканот?
Објавено во: Балкан 10 Август, 2018
Марија Захарова, портпаролката на руското Министерство за надворешни работи, која е во посета на Белград, не одговори на прашањето каков е ставот на Русија по прашањето за разграничувањето меѓу Србија и Косово и возврати со контрапрашање.
„Извинете, можеби не е правилно да одговорам на прашање со прашање, но нема ли вие да имате проблем со тоа? Тоа не е прашање за Русија, туку за Србија. Да повторам, нашиот став е непроменет во текот на повеќе години, нашиот став е практично заснован на меѓународното право и резолуцијата 1244“- рече Захарова.
Захарова истакна дека Русија нема да ја прифати лагата дека Косово било одвоено од Србија врз основа на референдумско изјаснување.
Таа изјави дека Русија со почитување ќе го прифати решението што ќе го избере Србија. Но, додаде дека доследноста е основна особина на руската надворешна политика и дека Белград го знае тоа.
Шефот на српската дипломатија, Ивица Дачиќ, порача дека треба им биде срам на оние лицемери што денес говорат дека нема да има повеќе промена на границите. Дачиќ истакна дека ова важи и за Македонија, која се сетила дека нема да има промена кога претходно ја поддржала независноста на Косово.
Српскиот претседател, Александар Вучиќ се залага за разграничување со Албанците.