Дали случувањата во СЈО ги загрозуваат евроинтеграциите?
Објавено во: Македонија 16 Јули, 2019
Министерот за надворешни работи, Никола Димитров повтори дека доколку нема датум за преговори со Европската Унија во октомври, тешко ќе се зборува за европерспективите понатаму.
Димитров кој синоќа се огласи на социјалните мрежи во однос на случувања поврзани со СЈО, вели дека сакал да порача дека граѓаните не треба да се разочаруваат и дека како што вели институциите се разбудиле.
„Никој не рече дека ќе биде лесно. Можеме да тонеме во разочарување и очај и да ја храниме самопоразувачката енергија дека од нас не бидува ништо. Со мазохизам и неразбирлива радост да ги дочекуваме лошите вести. Чашата секогаш да биде полупразна: “Ти кажав, не бива од нас држава”. Бидејќи, веста денес може да биде и ваква: системот, со сите маани, почнува да се бори со криминалот, без разлика од каде доаѓа. Дека ќе не’ биде и покрај се' и заради се'. И заедно со сите кои не веруваат дека ќе не’ биде. Дека борбата против криминалот никогаш нема да заврши. И ќе трае, оти е борба всушност на доброто против злото. На некој начин, таа борба, што мене како и многу други ме вовлече во и кон политиката, е на самиот почеток. Дека ќе треба интегритет, пот, солзи и многу работа за да ги тргаме наталожените раскомотени криминални мрежи. Дека сеирџиство и банално ликување не помагаат, ниту дефетизам и ширење немоќ, бидејќи најлесно е да се откажеме сите. Помага само да засукаме ракави и сите да работиме до последно. Бидејќи знаете што е државата? Сите ние, сите граѓани до последен. И кога фрламе по државата, фрламе и по себеси. Ќе не’ биде народе, тогаш кога секој во своето, ќе турка до последниот атом. Јас не дигам раце додека не не’ биде. Не сме ние ништо понеспособен народ од било кој друг. Мегданот тоа да го покажеме и докажеме е токму тука, токму сега. Ќе не’ биде и точка!“, напиша вчера Димитров на Фејсбук.
Интегритетот на СЈО не е загрозен, дејствијата на поединци не ги отсликуваат сите во обвинителството и не смее да ги доведат под прашање постапките кои се водени досега, соопштија денеска од тимот на СЈО. Катица Јанева не се појавила на работа, иако формало уште е шеф. Оваа реакција е по апсењето на Бојан Јовановски и Зоран Кичеец вчера, кои се сомничат дека рекетирале бизнисмени, и да влијаат кај јавен обвинител, а на Јанева и беше одземен телефонот за вештачење. Таа вчера си поднесе оставка во СЈО.