Денеска ќе се распише тендерот за проектирање на Забавниот парк во Скопје, изградбата започнува во септември

Добивај вести на Viber

Скопскиот градоначалник Петре Шилегов во утринската емисија на ТВ Сител информираше дека денеска Град Скопје распишува тендерот за проектирање на Забавниот парк, додека очекува неговата изградба да започне во септември.

Веќе подолго време метрополата нема забавен парк, каде што родители и деца, стари и млади ќе можат да се забавуваат и да ги поминат семејни денови. Во насока на изградба на нов забавен парк, Град Скопје на почетокот на 2020 година донесе одлука за земање заем наменет за изградба на овој забавен парк, но поради новонастанатата состојба поврзана со коронавирусот (ковид-19), оваа одлука се укина и средствата за задолжување се пренаменија за изградба и реконструкција на сообраќајници во градот Скопје.

Со новите две измени на одлуките на Советот годинава се предвидува фазно продолжување на реализацијата на овој капитален проект, каде што финансиските средства за проектирање, изградба, набавка на опрема-реквизити и нивно монтирање ќе се обезбедат од Буџетот на Град Скопје за 2021, 2022 и 2023 година.

Според податоците, забавниот парк ќе има два адреналински, шест семејни и осумнаесет детски реквизити, разни видови лулашки, вртелешки, тобогани и други забавно-рекреативни содржини. Граѓаните по повеќе од 40 години треба да добијат нов забавен парк.