Денеска завршува стариот закон за СЈО, започнува да функционира новиот
Објавено во: Македонија 30 Јуни, 2020
Од денеска престанува важноста на Законот за Специјалното јавно обвинителство и на сила стапува новиот Закон за Јавното обвинителство, кој беше донесен во февруари годинава, пред распуштањето на парламентот.
Според членот 110 од законот, се предвидува прислушувани разговори да не можат да бидат основа за подигнување нови обвиненија, туку тие само да служат како индиции. Сите прислушувани разговори што не се предадени во Судот како докази или индиции во истраги, Законот предвидува да се уништат.
„Новото законско решение не значи скриена амнестија на определени сторители на кривични дела. Со Законот, за потребите на јавното обвинителство ќе се одвојуваат најмалку 0,4 отсто од буџетот на државата. Со Законот се елиминираат политичките влијанија во изборот на обвинителите, бидејќи за избор во повисоко Јавно обвинителство сега услов е определен период јавниот обвинител да работел во пониското обвинителство. Значи ќе се почитува принципот на кариера“, вели Љубомир Јовески, републичкиот јавен обвинител, за Дојче Веле.
Предметите на СЈО покренати до 30 јуни 2017 година продолжуваат да се извршуваат според старите законски правила, односно за истите аудио-снимките ќе може да послужат како докази.
Со новиот Закон е предвидено јавниот обвинител кој раководи со Основното јавно обвинителство за гонење на организиран криминал и корупција да биде избран од јавните обвинители на непосредни избори.