Десет успешни компании со признанија за македонски квалитет
Објавено во: Економија 13 Декември, 2019
Во присуство на бројни гости, традиционално во рамки на манифестацијата „Македонски квалитет“, беа прогласени десетте добитници на признанието за 2019 година, кое го доделува Сојузот на стопански комори на Македонија под покровителство на претседателот на државата.
Добитници се компании од повеќе сектори од бизнис светот, но и образовна институција и КУД Мирче Ацев.
Признанијата ги доделија претседателот Стево Пендаровски, претседателот на Сојуз на стопански комори на Македонија, Данела Арсовска, како и претставници на претседателството на Сојузот.
Добитници на признанијата оваа година се КУД Мирче Ацев, компанијата „Типи Груп“, финансиската компанија „Бироком“ од Кичево, транспортната компанија „Беда логистик“, фармацевтската компанија „Фитофарм“, фирмата за управување со отпад и рециклирање „Евросуровина ПА“, првата приватна образовна установа, гимназијата „Нова“, потоа „Кривогаштани промет“, градежната компанија „Настел“ и компанијата за селектирање отпад „Пакомак“.
Претставниците на компаниите се збалагодарија на доделените признанија.
„Зад себе имаме долгогодишно искуство, впрочем работиме повеќе од 17 години и сме изградиле 37 големи објекти. Најновиот, деловниот центар ќе биде најголем во центарот на градот и еден украс на метрополата. Граден е со најсовремени најквалитетни материјали, со зелен мермер. Ги исполнува сите стандарди и е граден по највисоките критериуми за ИТ индустријата, рече сопственикот на Настел Зоран Азманов.
Претседателот Пендаровски им се заблагодари на компаниите и рече дека е добро што ги има од повеќе сектори.
„Убеден сум дека сите ние споделуваме заедничка визија за економски просперитетна и развиена држава. Вие сте носители на нашата национална економија и би сакал да ве охрабрам и понатаму да создавате квалитет. Како амбасадори на македонскиот бренд, ја имате мојата безрезервна поддршка во насока на унапредување и промоција на македонскиот квалитет, рече Пендаровски.
Оваа манифестација се одржува секоја година во знакот на оддавање признание и промовирање на деловните успеси на македонските претставници на национален бренд за тековната година, при што секоја година се доделуваат 10 признанија за Македонски квалитет, велат од Сојузот на стопански комори.