Димитриеска Кочоска: Доколку дојде до евро обврзница, жестоко ќе реагирам
Објавено во: Економија 24 Јануари, 2020
Доколку дојде до задолжување со евро обврзница секако дека жестоко ќе реагирам, бидејќи има причина за тоа, рече Даниела Димитриеска Кочоска, дополнителниот заменик министер во Министерството за финансии, во емисијата „Што не е јасно“ на ТВ Алфа.
- Од она што ме информираа во Собранието во моментот имаме две дополнителни задолжувања најверојатно во претходниот период се влезени во процедура. Како човек која долг период била во банкарскиот сектор секогаш е прашањето кога се задолжувате, за што се задолжувате, така да жестоко ќе реагирам само од причина што ние имаме краток период во кој што не е возможно да ги погледнете сите капитални инвестиции, да ја видите причината и потребата од истите и какви ефекти и додадена вредност ќе имаат, рече Димитриеска Кочоска меѓудругото.
Веќе ако државата се задолжува, тогаш треба да се задолжува за инвестиции кои што ќе бидат од интерес на граѓаните и подобрување на економијата, а не за непродуктивни работи, додава таа.
- Сметам дека треба да има задолжување за продуктивни цели односно задолжување за инвестиции кои што ќе бидат во интерес на граѓаните и на бизнисот и кои што ќе направат додадена вредност на економијата, вели Димитриеска Кочоска.