Димитров: Цел ден сме во консултации, по секој разговор со Беса одиме кај другите

Добивај вести на Viber

Министерот за надворешни работи Никола Димитров истакна дека преговорите со Беса бараат голем ангажман, затоа што потоа треба да се пеглаат односите и ставовите и со другите засегнати страни од планираното двотретинско мнозинство пред гласањето за затворање на уставните измени во Собранието.

- Нивниот фокус е словото. Ние сме мултиетничко општество и треба да внимаваме да не ги повредиме чувствата на другите граѓани кои не се етнички Македонци, а се наши сограѓани. Покрај македонскиот идентитет, ние треба да го заштитиме и идентитетот на заедниците кои не му припаѓаат на мнозинството - рече шефот на македонската дипломатија во студиото на 1ТВ.

Тов вели дека еден разговор со Беса повлекува цел круг на разговори со другите засегнати страни од двотретинското мнозинство и тоа,. според Димитров, е политичка умешност. Најинтензивни разговори се водат со БЕСА и двајцата пратеници на таа партија во Собранието и со лидерот Билал Касами повремено. 

-Цел ден сме во консултации, ова е здраво за нас на некој начин, за важни прашања разговараме, наоѓаме решенија тргнувајќи од државниот интерес, да ги покриеме главните грижи, да ги покриеме грижите на нашите сограѓани Албанци, Турци, Роми, Власи и сето тоа да биде во духот и рамките на Договорот од Преспа со што се става точка на едно подглавје каде бевме влечени назад и конечно да тргнеме напред како држава, вели Димитров.

Димитров додаде дека Германија сака да направи успешна европска приказна од Македонија и Преспанскиот договор во контект на пристигнувањето на канцеларката Ангела Меркел во официјална посета на Атина.

Шефот на дипломатијата истакна дека работите одат во добар правец и дека е очигледна добрата волја од сите страни.