Димитров: Му се извинив на Мас за честите посети на Берлин
Објавено во: Македонија 12 Септември, 2019
Хајко Мас, министерот за надворешни работи на Германија, денеска во Берлин одржа заедничка прес-конференција со шефот на македонската дипломатија Никола Димитров на која упати честитки, како што вели тој, до граѓаните на Северна Македонија за исполнетите услови да се отпочнат преговорите за членство во ЕУ.
„Сите услови се исполнети за почеток на преговори на ЕУ со Македонија. Промените се евидентни, а помеѓу Северна Македонија и Германија ќе продолжат да се градат мостови во иднина. Јасно е дека Северна Македонија припаѓа во Европа“, рече Мас пред јавноста.
Димитров е во Берлин, по посетата на Париз и Брисел, пред одлуката да се додели Датум за отпочнување на преговори со земјата во октомври, а македонскиот МНР наведе дека дури и му се извинил на Мас за честите посети на германската престолнина.
„Загубивме генерации поради политички проблеми и нерешавање на спорот со името со Грција. Направиве големи чекори и во односите со Грција и со Бугарија, како и во градење на функционална либерална демократија, која е препознаена од Европската комисија. Вие ќе имате што да кажете за нас од 15 до 17 октомври. Ќе го направиме овој регион европски, а тоа е добро и за Германија. И во политичка и во европска смисла“, наведе Димитров.
Тој додаде дека Македонија и натаму со подеднаков интензитет ќе ја контролира јужната граница од нелегалната имиграција.