Димитров: Со Бугарија постигнавме компромис во кој двете страни се еднакво среќни
Објавено во: Македонија 20 Јули, 2017
Со Бугарија постигнавме компромис во кој двете страни се еднакво среќни и еднакво несреќни. Компромисот беше тежок за постигнување, изјави вечерва на ТВ 24 министерот за надворешни работи, Никола Димитров.
„Никогаш од самостојноста на Македонија од 1991 година наваму не сме имале толку видлива инволвираност на Собранието и на опозицијата во една ваква работа. Уставните процедури велат дека има преговарачки тим, се преговара, се усогласува текстот и тој поминува низ влада, се потпишува и потоа станува договор и оди на ратификација во Собранието. И тука има многу време, и за јавноста и за опозицијата”- изјави Димитров.
Тој додаде дека пред се станува збор за нацрт текст, а ќе стане договор кога ќе ги добие потписите на двете страни.
„Има овде едно големо лицемерие. Тој договор е преговаран и самиот текст и е добро познат на опозицијата бидејќи тие го преговарале 5-6 години. Ние го преговараме 50 дена или активно 30 дена. Потребата на тој договор е резултат на лошите односи што сме ги имале со Бугарија. Не сакам никого да обвинувам, но факт е дека поради влошените односи настанала потребата да има договор за пријателство“ - вели Димитров.
Тој рече дека и во овој договор стои “македонски јазик” и дека овој договор не го загрозува националниот интерес на Македонија.