Шар планина наскоро ќе биде прогласена за Национален парк

Добивај вести на Viber

Со планински марш од неколку километри, вицепремиерот Бујар Османи, градоначалничката на Тетово, Теута Арифи и неколку амбасадори и претставници од амбасадите во земјава, уште еднаш ја промовираа идејата Шар Планина да се прогласи за Национален парк.

„Тука сме, заедно со Општина Тетово и амбасадорите, кои ни се придружија во оваа акција да ја промовираме потребата од прогласување на Шар Планина во национален парк. Можевме да слушнеме дека работите околу ова привршуваат и може да очекуваме во наредните месеци тоа и да се реализира и мило ми е што целата таа динамика кореспондира со процесот за започнување на преговори за влез во ЕУ“, истакна вицепремиерот.

Исто така, Османи додаде дека со овој марш се пренесуваат и две пораки.

„Политички созреавме да станеме дел од Унијата, меѓутоа и во делот на практичните прашања на европското живеење, како што е животната средина, ние веќе сме подготвени да живееме европски. Северна Македонија до сега има 9 проценти од нејзината територија под национални паркови а со прогласување на Шар Планина за национален парк тој процент би изнесувал 12 со што веќе се доближуваме до европските стандарди на заштитени подрачја“, рече вицепремерот за евроинтеграции.