До кога за нив закон нема да важи: текстилците на Истокот работеа и денес
Објавено во: Македонија 14 Јуни, 2019
Иако денешниот ден е прогласен за неработен, дискриминаторскиот однос на газдите од Истокот нема крај.
Фабриките во повеќе градови во источна Македонија и денес работеа а ниту горештините и жолтата алармантна фаза не ги поколебаа работодавците да ги држат цело работно време текстилците кои се едни од најнеплатените работници во државата.
-Ние сме научени да работиме секој празник. За нас нема празник, делник. Ако можат и во недела ќе не остават да работиме-се пожалија граѓани од една текстилна фабрика.
Ова не е прв пат, туку веќе со години наназад работничките права не се почитуваат и се работи и за празници како денешниот.
Бадијала се ригорозните казни кои ги воведуваат надлежните, коментираат многумина на социјалните мрежи.
„Кога во некоја земја на Запад е празник или недела, речиси ништо не работи. Се избориле работниците да се почитува тоа. Луѓето претходниот ден ги купуваат намирниците. А во неработниот ден (празник или недела) како се' да застанало.
Има сето тоа еден важен ефект од тоа, кој не мора да биде свесен. Луѓето, на доста кратки интервали, се потсетуваат што значи ако работниците не ја вршат работата. Дека во таков случај се' застанува. И работниците и оние од другата страна ја сфаќаат моќта која ја имаат работниците, барем во потенцијал. Сфаќаат дека ТИЕ се оние кои го овозможуваат непреченото функционирање на животот.
Во Македонија и во другите неразвиени земји редовно се работи и во недела и за празници. Многумина ќе се почувствуваат длабоко обесправени ако не можат и во 21 часот да претрчаат до маркетот за да купат нешто ситно. И ретко се случува да се почувствува моментот што значи кога работниците не работат. И тоа дополнително ги оневозможува работниците самите да го почувствуваат потенцијалот на работничката моќ.
Сето ова е мал детал од животот, но класната свест се гради и преку мали детали“, напиша на Фејсбук граѓанскиот активист Здравко Савески.
Дел од граѓаните пак се шегуваат дека сигурно и инспекторите за труд отишле продолжениот викенд да се разладат кај соседите во Грција наместо да ги тресат богатите газди за кои законот не важи.