Доктор Јовев: Без трансплантацијата, на Иван му се прогнозираа уште неколку месеци
Објавено во: Македонија 25 Мај, 2020
Лидерот на тимот доктори кои ја направија првата трансплантација на срце д-р Сашко Јовев, во интервју за ТВ24 рече дека пациентот е стабилен и веќе не е на респиратор за дишење.
Според д-р Јовев, пред трансплантацијата, докторите прогнозирале дека 54-годишниот Иван Огненовски би можел да живее уште неколку месеци. Сега е најважно неготово тело да го прифати новото срце.
„Основниот проблем кај пресадувањето на срце е тоа што организмот може да го препознае како стран орган. Првиот тип на отфрлање којшто е многу брз може да се случи веднаш и тој го одминавме. Вториот тип е овој којшто може да се случи во текот на неколку месеци, но за тоа даваме многу јака терапија за да се спречи истото. Третиот тип е после повеќе години, којшто наликува на коронарна срцева болест. Но, и покрај тоа што ова звучи вака сериозно, генерално перспективата е многу добра затоа што со овие лекови повеќе од 75 отсто од пациентите живеат повеќе од 5 или 10 години“, вели Јовев.