Домаќинствата се уште не може да продаваат струја, кочи правилникот

Добивај вести на Viber

Со новиот закон за енергетика, македонските домаќинства можат да произведуваат електрична енергија од сонце и да ја користат за сопствени потреби или да ја предаваат на пазарот, но ќе треба да почекаат уште некој месец, објави Нова Македонија.

Се уште не е изготвен неопходниот правилник за обновливи извори на енергија, со кој треба да се дефинираат условите и начинот како ќе се предава енергијата во дистрибутивната мрежа.

Од министерството за животна средина сметаат дека тој ќе биде готов следниот месец.

– Со новиот закон за енергетика се создадоа предуслови за либерализација на пазарот, поголема конкурентност на чинителите во енергетскиот сектор, раздвојување на надлежностите на дел од енергетските компании, како и нови форми за поддршка на резиденцијалниот сектор за производство на електрична енергија за сопствени потреби. Интересот е огромен како од домаќинствата, така и од малите и средните претпријатија што имаат можност да го реализираат ова – кажа Владимир Сарач, в.д. директор на Агенцијата за енергетика на Република Македонија.

Тој додаде дека интензивно се работи на донесување на неопходната подзаконска регулатива, која ќе овозможи целосна реализација на мерката со која и домаќинствата и секторот за производство на енергија ќе имаат голема корист.

– Сметам дека со донесувањето на правилникот ќе се овозможи масовно инсталирање фотоволтаици на семејните покриви и користење на електричната енергија за сопствени потреби – додаде Сарач.

Интересот за искористување на сончевата енергија и другите обновливи извори на енергија во Македонија е голем, посочуваат од регулаторната комисија за енергетика и истакнуваат дека искористеноста на повластените тарифи е голема.
Оттаму додаваат дека вкупната инсталирана моќност за која ќе се применуваат повластените тарифи за купопродажба на електрична енергија произведена од фотонапонски електроцентрали изнесува 16,7 мегавати и таа е целосно исполнета.