ДРАГАН НИКОЛОВСКИ за сите детали пред финалето: Хрватите ја запоседнаа Москва

Добивај вести на Viber

Без трошка забелешка за домаќинот, Русија, со набој од полетот што навивачите го прават во Москва, нашиот спортски новинар Драган Николовски за Фактор пренесува дел од магијата пред денешното финале на Лужники. Како долгогодишен новинар следел и други првенства, но вели мундијал си е мундијал. Во Москва е со Тони Стојановски, но не беа таму од стартот на светското. Вели, градот бил преубав оти е таков и секогаш но сега и дополнително затоа што пулсира спортски. Вечерва за титулата светски првак се борат Франција и Хрватска.

„Прекрасно е чувството кога првпат ќе ја доживеете магијата на Црвениот Плоштад, токму кога низ него маршираат колони на наследници на некогашни неуспешни освојувачи на Москва. Кога црвената и белата боја шаховски разместени се оддалеку препознатливи и се знак дека големиот спортски настан има неочекуван протагонист на финалето. Хрвати толку масовно околу главните московски знаменитости никогаш не би имало, ако од речиси никаде нивната фудбалска репрезентација не стигна до финалето на Светското Првенство. Наполно заслужено, бидејќи на „Лужники“ вечерва нема да истрчаат само поради предвремените елиминации на Германија, Аргентина, Бразил или на Шпанија, туку поради тоа што со натчовечки напори го стекнаа правото да се борат за круната за којашто до само пред некој ден можеа да мечтаат“, вели Николовски.

Го прашавме и за исходот, какви се неговите очекувања од натпреварот. Логично, вели и здраворазумски Франција е фаворитот, ама коцкестите имаат шанси.

„Без оглед на се, Франција е фаворит. И тоа голем. Секоја чест на Модриќ, Ракитиќ, Манџукиќ и на Перишиќ, но вагата натежнува на страната на Погба, Мбапе, Гризман и на Канте. Ама, да не заборавиме, ова СП е се, само не и турнир со натпревари чијшто епилог е лесно да се претпостави врз основа на спортски познавања, или на претходни искуства. Така што, поради непредвидливоста којашто е одлика на целиот шампионат во текот на овој месец, однапред не би им ги одземал шансите на „коцкестите“ да станат осмиот светски првак во историјата. Дури ниту фактот што сметајќи ги продолженијата на сите три средби во нокаут-фазата одиграа 90 минути повеќе од Французите не би го сметал како нивни хендикеп, туку како скриен адут. И со Данска и со Русија и со Англија се враќаа по негатива, така што менталната цврстина и психолошката подготвеност им е одлика којашто не смее да се потцени и да се омаловажи“, вели Николовски.

Тој и Стојановски го коментираа и полуфиналниот двобој во којшто Хрватите ја елиминираа Англија. Вели дека можеби лично не помирисале каков бил мундијалскиот амбиент во преостанатите девет градови во коишто се играа натпреварите, меѓутоа доволно процениле дека Русија се покажа како беспрекорен домаќин во организациска смисла.  

А.Т.