Државна видеолотарија: Не трошиме државни пари за апаратите
Објавено во: Македонија 17 Јануари, 2020
Државната видеолотарија не троши државни пари затоа што не е буџетски корисник, реагираат денеска оттаму по обвинувањата на двајца пратеници од опозицијата според кои државата ќе троши пари да набавува апарати за потребите на Државна видеолотарија. Велат дека овие напади може да се сфатат како дел од предизборниот колаж и дека се во функција на пропагандните механизми.
„Јавната набавка е согласно планот за јавни набавки од јануари 2019. Набавката е рамковна за период од 2 години сукцесивна согласно потребите на друштвото. Целата процедура за набавка е транспарентна и согласно законот. Тендерот првично беше објавен на 14 октомври 2019, но не се јави ниту еден заинтересиран, поради што целата постапка се повтори. Бирото за јавни набавки изврши управна контрола на постапката која резултираше без суштински забелешки на постапката. Постапката беше повторена на 04.12.2019, а во текот на оваа постапка повторно беше извршена управна контрола на бирото за јавни набавки, од која и во овој случај немаше забелешки. На ова постапка, пристигна само една понуда која ги задоволуваше бараните критериуми, по што е потпишана рамковната спогодба за реализација на јавната набавка, објаснуваат од Државна видеолотарија.
Додаваат дека спогодбата се однесува на временски период од две години, во кој сукцесивно ќе се врши набавка согласно потреби на работењето на компанијата. Тоа значело дека нема веднаш да бидат набавени 1500 апарати, туку ќе се набавуваат апарати согласно потребите на друштвото за нормално функционирање на истото.
Државна видеолотарија е трговско друштво со ограничена одговорност, во која државата е застапена со 51 процентен капитал преку Државна Лотарија, а 49 отсто е приватен странски капитал.
Во соопштението за јавност се вели дека не се буџетски корисник, а значајно придонесуваат за раст на приходите на државниот буџет.
„Во 2019 по основ на данок на добивка, данок на личен доход, посебна давачка од игри на среќа, ДДВ и дивиденда, Државниот буџет од Државна видеолотарија се дополнил со 750.966.809 денари. Како општествено одговорно компанија настојуваме да бидеме одговорни кон ранливите категории во нашето општество, но и да придонесеме за унапредување на спортот, образованието и културата. Државна видеолотарија е единствена компанија која развива и применува програма за одговорно играње во земјава, стои во реакцијата.
Се додава и дека според резултатите за минатата година Државна видеолотарија е регистрирана како 23 најуспешна компанија во земјава.