„Државни патишта“ досега со продажба на 20.602 електронски картички и тагови за патарина
Објавено во: Економија 28 Ноември, 2020
Оваа година до сега ЈП „Државни патишта“ во рамки на електронската наплата на патарина, продаде вкупно 6895 уреди, од кои 4366 електронски МСмарт картички и 2529 електронски уреди Мтаг, со што, годинава е остварен промет само од продажба на уреди во висина од 3.741.400 денари.
Од јавното претпријатие велат дека направени се 103.326 поединечни надополнувања на уредите од почетокот на 2020 до крајот на октомври и прометот по тој основ изнесува 235.366.191 денари.
Инаку во 2019 „Државни патишта“ за половина година откако започна проектот, продаде 13.707 електронски картички и тагови откако од минатогодишниот јули беше воведен електронскиот систем на наплата на патарините низ Коридорот 10.
Од започнувањето на електронската наплата на патарина, па до 15-ти месецов се продадени вкупно 20.602 електронски картички и тагови.
-Ова укажува дека електронската наплата на патарина функционира успешно. Нашите корисници брзо се прилагодија на новиот систем за наплата затоа што самиот систем си има бенефити, брз проток, брз транзит, плаќање на фактури и онлајн, следење на состојби и транзити преку веб портал со што се избегнува дополнителна документација и слично. Фидбекот е позитивен, а тоа го покажуваат и остварените резултати, информираат од ЈПДП за МИА.