ДУИ знаеле дека цел закон е испратен во Венецијанска комисија, тврди Заев
Објавено во: Македонија 11 Декември, 2019
ДУИ знаеле дека цел закон е испратен во Венецијанска комисија, вели премиерот Зоран Заев.
„Можеби Артан Груби не знаел, но владините коалициони партнери од ДУИ знаеле дека целиот Закон за јазици ќе биде испратен на разгледување во Венецијанската комисија“, вели Заев.
Пратеникот на ДУИ, Артан Груби синоќа изјави дека очекувале само два члена од законот да се испратат во Венеција.
Синоќа во Топ Тема, пратеникот Груби тврдеше дека, од Министерството за правда го испратиле целиот закон на оценување, без знаење на ДУИ.
Министерката за правда Рената Дескоска рече дека се бараат начини како да се спроведат препораките од Венецијанската комисија за Законот за употреба на јазиците, во делот на судските постапки.
Талат Џафери, претседателот на Собранието, вели дека предлог-измените на Законот за употреба на јазиците кои ги најавува ВМРО-ДПМНЕ нема да поминат во Законодавниот дом бидејќи, според спикерот, за тоа е потребно двојно мнозинство односно Бадентерово мнозинство.